Bəzən xarici ölkələrdə yaşayan vətəndaşlarımız bir müddətdən sonra öz ölkələrinə geri qaytarılırlar. Bu il yanvarın 1-dən noyabrın 1-nə qədər təkcə Ukraynadan 226 Azərbaycan vətəndaşı geri qaytarılıb. Onlar bunu müxtəlif hüquqi səbəblər ilə əlaqələndiriblər.
Bəs ümumiyyətlə, vətəndaşlarımız nə üçün xarici ölkələrdən deport olunurlar?
"Avrasiya Miqrasiya Təşəbbüsləri Platforması" İctimai Birliyinin sədri Azər Allahverənov “Operativ Media”ya bildirib ki, xarici ölkədə yaşayan Azərbaycan Respublikasının vətəndaşları həmin ölkədə qeyri-qanuni əsaslarla yaşadıqda və bu fakt müvafiq dövlət qurumları tərəfindən aşkarlandıqda öz ölkəsinə qaytarılır:
“Şəxsin qeyri-qanuni əsaslarla yaşadığı ölkədə qalması üçün hər hansısa əsaslar yoxdursa, bununla əlaqədar qaytarılma barədə qərar qəbul olunur və onun istəyib-istəməməsindən asılı olmayaraq mütləq qaydada öz ölkəsinə qaytarılır. İkinci bir halda əgər şəxsin sənədləri qaydasında deyil və ya onun maddi durumu imkan vermir ki, ölkəsinə qayıtsın, bu zaman o, müxtəlif beynəlxalq təşkilatlara müraciət edir və könüllü qayıtmaq niyyətində olduğunu bildirir. Almaniyada, Skandinaviya ölkələrində, Hollandiyada bir neçə belə beynəlxalq təşkilat fəaliyyət göstərir. Eyni zamanda bu prosesdə Beynəlxalq Miqrasiya Təşkilatı da iştirak edir, onlar şəxsin geri qaytarılması ilə bağlı zəruri təşkilati məsələlərinə dəstək göstərir, hüquqi yardıma ehtiyacı varsa, bunu da yerinə yetirir. Misal üçün, həmin vətəndaşımızın səhhətində problem varsa, bununla bağlı zəruri işlərin yerinə yetirilməsi və ölkəyə getməsi üçün birtərəfli biletin alınması kimi məsələləri həll edir. Hətta bəzi hallarda ola bilər ki, müxtəlif beynəlxalq təşkilatlar həvəsləndirici proqramlar da işə salsın və şəxs öz ölkəsinə qayıdanda orada məşğulluq məsələlərini həll etmiş olsun”.
Ekspert qeyd edib ki, bəzən şəxsin öz ölkəsinə qaytarılması onun beynəlxalq axtarışda olması ilə də əlaqəli ola bilər:
“Ola bilər ki, həmin adam “İnterVol”un xətti ilə verilib beynəlxalq axtarışa və o, hüquq-mühafizə orqanları tərəfindən hansısa ölkənin ərazisində müəyyən edilib. Belə olduğu təqdirdə həmin şəxsin ölkəyə ekstradisiyası baş verir. Məsələn, son zamanlar Rusiyadan, Ukraynadan ölkəyə qaytarılan şəxslər olub ki, onlar beynəlxalq axtarışda olublar və həmin ölkənin ərazisində sığınaraq yaşayıblar. Bu kəslər hüquq-mühafizə orqanları tərəfindən aşkarlandığı təqdirdə Azərbaycana qaytarılması təmin edilib”.
Sevinc İbrahimzadə