Azərbaycan Respublikası Prezidentinin Sərəncamı ilə ədliyyə nazirinin müavini – Penitensiar xidmətin rəisi vəzifəsinə təyin olunan Mirsaleh Miradil oğlu Seyidov iyulun 11-də ədliyyə naziri Fikrət Məmmədov tərəfindən kollektivə təqdim olunub.
Ədliyyə Nazirliyindən "Report"a bildirilib ki, bununla bağlı Penitensiar xidmətin Baş idarəsinin rəhbər şəxslərinin, cəzaçəkmə müəssisələri rəislərinin, habelə nazirliyin digər aidiyyəti məsul işçilərinin və vətəndaş cəmiyyəti nümayəndələrinin iştirakı ilə keçirilən iclasda ədliyyə naziri çıxış edərək bu il 100 illiyini qeyd etdiyimiz ümummilli lider Heydər Əliyevin təməlini qoyduğu və ölkə Prezidenti İlham Əliyev tərəfindən uğurla davam etdirilən ədliyyə, o cümlədən penitensiar sistemdə aparılan mütərəqqi islahatlardan, məhkumların hüquqlarının qorunması üzrə görülən ardıcıl tədbirlərdən, əfv və amnistiya aktlarının geniş tətbiq olunaraq həyata keçirilən humanizm siyasətindən bəhs edib.
Dövlət başçısının cari ilin mayında Ümummilli Liderin yubileyi münasibətilə imzaladığı Əfv Sərəncamının müstəqillik dövrümüzün ən böyük əfv aktı olduğu bildirilib. Respublikamızın Birinci vitse-prezidenti Mehriban Əliyevanın təşəbbüsü ilə elan edilmiş amnistiya aktları ilə minlərlə ailələrə sevinc bəxş olunduğu vurğulanıb.
Eyni zamanda, dövlət başçısının penitensiar sahədə fəaliyyətin təkmilləşdirilməsinə dair Sərəncamının və məhkəmə-hüquq islahatlarının dərinləşdirilməsi haqqında Fərmanının icrası, o cümlədən cəza siyasətinin humanistləşdirilməsi, həmçinin məhkumların saxlanma şəraitinin yaxşılaşdırılması üçün penitensiar infrastrukturun müasirləşdirilməsi üzrə görülən tədbirlərdən danışılıb.
F.Məmmədov ədliyyə sahəsində ictimai iştirakçılığın geniş tətbiqini qeyd edərək uzun illərdir Ədliyyə Nazirliyi yanında fəaliyyət göstərən İctimai Şuranın penitensiar müəssisələrə ictimai nəzarətin həyata keçirilməsində fəal iştirakını vurğulayıb.
Bu sahədə şəffaflığın artırılması, vətəndaş-məmur münasibətlərinin sağlam zəmində qurulması ilə bağlı dövlət başçısının tələblərinin daim rəhbər tutulması, əməkdaşların məsuliyyət hissinin və tələbkarlığın yüksəldilməsi, etik davranış qaydalarına dönmədən əməl edilməsi, sui-istifadə və korrupsiyaya şərait yaradan digər halların qarşısının qətiyyətlə alınmasının vacibliyi bildirilib.
Nazir Xidmətin yeni rəisi M.Seyidovun uzun müddət bu sahədə peşəkar fəaliyyətini qeyd edərək qarşıda duran vəzifələri diqqətə çatdırıb, konkret tapşırıqlar verib.
Çıxış edən nazir müavini – Xidmətin rəisi M.Seyidov ölkə Prezidentinin göstərdiyi yüksək etimadı doğrultması, penitensiar sistemin fəaliyyətinin dövlət başçısının tələblərinə uyğun təkmilləşdirilməsi üçün səylərini əsirgəməyəcəyini bildirib.
