Qaxda çobanla yaylağa gedən zaman itkin düşmüş kişinin meyiti tapılıb.

"Operativ Media" "APA"ya istinadən xəbər verir ki, 11 gün əvvəl Qax rayonu Sarıbaş kənd inzibati ərazisinin yaxınlığında yüksək və çətin relyefli Alagöz dağının yaylağında itkin düşən, rayonun İlisu kənd sakini 30 yaşlı Rəhman Sədrəddin oğlu Kamallının meyiti axşam saatlarına yaxın İlisudan Sarıbaş kəndinə gedən yolun üstündə, Dağküsən dağı ərazisində tapılıb. R. Kamallının meyitini düşürmək üçün əraziyə İlisu kənd sakinləri, mərhumun yaxınları və müvafiq qrum nümayəndələri gedib.

Qeyd edək ki, R. Kamallı iyulun 23-ü günorta saatlarında rayonun Sarıbaş kənd sakini olan Ramazan adlı çobanla Alagöz dağındakı yaylağa gedərkən itkin düşüb. İyulun 24-dən onun axtarışlarına Fövqaladə Hallar Nazirliyinin (FHN) Şimal-qərb Regional Mərkəzinin xilasetmə qüvvələri, DİN-in Qax rayon Polis Şöbəsinin əməkdaşları və ərazini yaxşı bilən İlisu, Ağçay və Sarıbaş kənd sakinləri qoşulmuşdu.