Bakı və Abşeronda 450 mindən çox sənədsiz ev var. Sənədsiz evlərin probleminin həlli isə hələ də real görünmür. Bu tipli evlərin sayı isə durmadan artır. Xüsusilə “Makler evləri" kimi bilinən yeni evlər var ki, kiçik bir torpaq sahəsində bir neçə ev tikilərək satılır.
“Operativ Media” bu evlərin problemlərini və gələcək taleyinin necə olacağını araşdırıb.
“Makler evləri"nin daha çox təklif olunduğu ərazilər Xırdalan, Masazır, Binə, Hövsan, Ramanadır.
Əmlak məsələləri üzrə ekspert Nofəl Quliyevin sözlərinə görə, bu evlərə tələbat son illərdə artıb:
“Əvvəllər də maklerlərin tikib satdığı evlər olurdu. Amma insanlar istəyir ki, özü tiksin, tikintidə iştirak etsin. Çünki tikinti zamanı hansı materiallar işlənib bilmək istəyir. Son zamanlar isə kimlərsə 10 sot torpaq alır, içində də az qala 10 dənə ev tikir. Onların təməli necədir, hansı marka sement işlədiblər sual altındadır. Tikinti təhlükəsizliyi ilə bağlı böyük bir sual var”.
Ekspert deyir ki, paytaxtda kirayə mənzillərin qiymətinin bahalaşması bu evlərə tələbatı artırıb:
“Alan insan düşünür ki, hər ay 500 manat verməkdənsə, elə öz evim olsun. Qaz, işıq, su ilə təmin olunanlar da var, amma adətən çoxunda qaz olmur. Hətta su da problemdir. Həyət ya çox az, ya da heç olmur. Elə ona görə də bu evləri 10 min manata da tapmaq olur. Qiyməti onun hansı keyfiyyətdə olduğunu göstərir. Bir müddət sonra isti-soyuqdan divar kağızları sıradan çıxır, əksəriyyətində nəmişlik olur. Zəlzələ olarsa, təhlükəni artıq demirəm”.
Nofəl Quliyevin sözlərinə görə, “Makler evləri"nin normativ sənədləri olmadığından həmin evə qeydiyyata da düşmək olmur.
“Kimlərsə hansısa yollarla tikintini edib başa çatdırırlar. Kupça almaq isə mümkün olmur. Torpağın təyinatı uyğun olmalıdır, icra hakimiyyətindən tikintiyə icazə və digər sənədlər lazımdır ki, çıxarış alınsın. Amma faktiki olaraq kupçanın alınması real deyil”.
