Artıq Bakıdan daha ucuz qiymətə xarici ölkələrə səfər etmək mümkün olacaq.
“Operativ Media” ya açıqlama verən turizm üzrə ekspert Elgün Babayevin sözlərinə görə, 10-a yaxın lou-koster sxemi ilə uçuş həyata keçirən aviadaşıyıcı Bakıdan birbaşa uçuşlar həyata keçirir.
Ekspert bildirir ki, aşağı büdcəli aviadaşıyıcıların fəaliyyətinin genişlənməsi qiymətlərdə özünü göstərir:
“Son bir ildə lou-kosterlərin sayı nəzərəçarpacaq dərəcədə artıb. Abu-dabi, Dubaya 120 manata gediş-gəliş mümkündür. Avropa ölkələrinə də uçuşlar var. Oktyabr-noyabr ayı üçün İtaliya biletləri var idi 200 manata. Əsas məsələ biletləri bir neçə ay qabaqcadan almaq lazımdır”.
Elgün Babayev deyir ki, aşağı büdcəli daşıyıcılar daimi daşıyıcılar müqayisə xidmət səviyyəsi aşağıdır. Bu aviadaşıyıcılarla səyahət zamanı baqaj, yemək, su əlavə ödənişlidir. Lakin, həm xarici ölkələrdən gələn turistlərin, həm də yerli turistlərin marağı böyükdür. Lou -kosterlərin sayının artmasının digər aviadaşıyıcıların bilet qiymətinə təsir edəcəyi isə gözlənilmir:
“Yer seçimi imkanı ödənişlidir. Uçuş zamanı su, qida və digər xidmətlər ödənişlidir. Oturcaqlarında belə fərq hiss olunur. Amma, qiymətlərə baxanda insanlar daha çox lou-kosterlərə üstünlük verir. Lou-kosterlərin sayının artması isə digər daimi aviadaşıyıcıların qiymətlərinə təsir etməyəcək. Çünki onların xidməti dəyişmir. Bir qayda olaraq yük baqajı, qidalanma qiymətə daxildir.
Ekspert onu da bildirdi ki, əvvəllər lou-kosterlər bir çox hallarda uçuşları təxirə salırdı. Müştərinin biletinin ödənişi geri qaytarılsa da, yeni bilet daha baha başa gəlirdi. Son zamanlar isə bu hal yaşanmır.
