Azərbaycan–İtaliya tərəfdaşlığı gənc nəslə yeni imkanlar açır - ŞƏRH
"Azərbaycan və İtaliya münasibətləri son illərdə strateji tərəfdaşlıq müstəvisinə yüksəlib. İki ölkə arasında enerji, iqtisadiyyat, mədəniyyət və təhsil sahələrində əməkdaşlıq dərinləşir. Bakıda İtaliya–Azərbaycan Universitetinin açılışı həmin tərəfdaşlığın yeni bir simvolu kimi qiymətləndirilə bilər".
Bu fikirləri Operativ Media-ya açıqlamasında Milli Məclisin Elm və Təhsil komitəsinin üzvü, deputat Elnarə Akimova deyib.
O bildirib ki, universitetin yaradılması sadəcə təhsil layihəsi deyil bu, iki xalq arasında elmi və mədəni körpünün qurulmasıdır. Tələbələr həm Azərbaycan, həm də İtaliya akademik mühitinin üstünlüklərindən faydalanacaq, Avropa təcrübəsi ilə yerli reallıqlar birləşəcək: “Bu isə gələcəkdə region üçün yeni nəsil mütəxəssislərin yetişdirilməsinə xidmət edəcək. Həmçinin ölkəmizin azad edilmiş ərazilərdə təhsilin inkişafına yönələn siyasətinə də töhfə verə bilər.
Bildiyiniz kimi, Universitetin əsası 2022-ci ildə Bakıda ADA Universitetinin kampusunda Azərbaycan Prezidenti İlham Əliyev və İtaliya dövlət rəsmilərinin iştirakı ilə qoyulub. Layihə çərçivəsində İtaliyanın aparıcı ali məktəbləri – “La Sapienza” Roma Universiteti, Politecnico di Milano, Luiss Guido Carli Universiteti, Bolonya Universiteti və digər nüfuzlu elm ocaqları ilə əməkdaşlıq nəzərdə tutulur”.
Elnarə Akimova sözlərinə belə davam edib: “İtaliya–Azərbaycan Universiteti həm də tərəflərin strateji tərəfdaşlığının simvoludur. Əgər enerji layihələri – xüsusilə Cənub Qaz Dəhlizi – bu əməkdaşlığın iqtisadi dayağıdırsa, yeni universitet onun intellektual və mədəni sütunlarından biri olacaq".
Ayşən Sadıxadə
