QUAD ölkələrinin dəniz təlimləri başlayıb
Təhlükəsizlik üzrə Dördtərəfli Dialoq (QUAD) qrupuna daxil olan ABŞ, Yaponiya, Avstraliya və Hindistan illik “Malabar” dəniz təlimlərinə başlayıb.
Operativ Media Yaponiya mediasına istinadla xəbər verir ki, Hind-Sakit okean bölgəsində regional əməkdaşlığı gücləndirməyi hədəfləyən QUAD-ın təlimlərinə Yaponiya esminesi və sualtı qayığı, eləcə də digər üç iştirakçı ölkənin freqatları və gəmiləri daxildir.
Yaponiya dəniz özünümüdafiə qüvvələrinin Yokosuka bazasında "İse" esminesi ilə keçirilən açılış mərasimində təxminən 200 komandir və şəxsi heyət iştirak edib. Donanma komandiri vitse-admiral Omaçi Katsuşi eyni düşüncəli ölkələrlə sıx koordinasiyanın dəyərini vurğulayıb.
"Ünsiyyət qurmaq, əlaqələndirmək və birlikdə fəaliyyət göstərmək qabiliyyətimiz ortaq problemlərin həlli və dəniz komandanlığının təhlükəsizliyi üçün vacibdir", - deyə vitse-admiral bildirib.
ABŞ-nin 7-ci donanmasının komandiri vitse-admiral Patrik Hannifin Hind-Sakit okean bölgəsinə qarşı hər hansı bir təhdidin ortaq olduğunu, buna görə də komanda işinin vacibliyini bildirib.
Təlimlər noyabrın 12-dək davam edəcək.
QUAD Asiya-Sakit okean regionunda və Hind okeanı zonasında qarşılıqlı fəaliyyət mexanizmi kimi 2007-ci ildə təsis edilib. 2017-ci ilin noyabrında dörd ölkə Hind-Sakit okean regionunda vacib gəmiçilik marşrutlarının təhlükəsizliyini təmin etmək strategiyası çərçivəsində yeni koalisiya formalaşdırıb.
QUAD rəsmi hərbi ittifaq deyil və NATO kimi kollektiv müdafiə öhdəliyi yoxdur. Lakin son illərdə onun hərbi və təhlükəsizlik əməkdaşlığı əhəmiyyətli dərəcədə genişlənib.
