Sosial şəbəkələrdə xəstəlik adından pul yığan dələduzların tələsinə necə düşməyək?

Sosial şəbəkələr hazırda cəmiyyətin bir-biri ilə əlaqə qurması üçün ən sürətli vasitədir. Elə buna görə də insanlar hansısa problemlə qarşılaşdıqları zaman bunu sosial medianın gücü ilə işıqlandırırlar. Bəziləri də xəstə insanların bank kartı məlumatlarını paylaşırlar ki, imkanlı şəxslər kömək etsinlər. Lakin burada da insanların yardımsevərliyindən sui-istifadə edərək dələduzluq edənlər olur.

Bəs sosial şəbəkələrdə xəstəlik adından cəmiyyətdən pul yığan dələduzların tələsinə düşməmək üçün nə etməliyik?

Mövzu ilə əlaqədar təhlükəsizlik üzrə ekspert Elmar Nurəliyev "Operativ Media"ya açıqlamasında bildirib ki, həmin şəxsin, həqiqətən, yardıma möhtac olduğunu mütləq araşdırmaq lazımdır:

"Son zamanlar internet platformaları üzərindən dələduzluq hallarının artması müşahidə edilir. İnsanları aldadaraq onların pullarını mənimsəyənlər çoxalıb. Ona görə də əgər sosial şəbəkələrdə bu kimi təkliflər olarsa, pul göndərməmişdən qabaq mütləq həmin şəxsin kimliyini aydınlaşdırsınlar. Yəni həmən profilin tanıdıqları şəxs olduğuna əmin olsunlar, xəstə və yaxud imkansız olan adamın yaxınları ilə əlaqə qurub maraqlandıqdan sonra qarşılıq versinlər. Bəzən elə olur ki, sosial şəbəkə hesabı oğurlanır və həmin hesabdan başqalarına müraciət olunur. Digərləri də həmin hesabı tanıdığı üçün ona rahatlıqla inanır. Dələduzların çoxu insanların mərhəmət hissindən istifadə etmək üçün özlərinə bu metodu seçirlər. Təbii ki, ehtiyacı olan insana maddi imkanları çatanların kömək etməsi yaxşı haldır, lakin araşdırmadan, kor-koranə atılan addımlar sonda aldanmaya gətirib çıxarda bilər".