Ağdam və Ağdərədəki yanğın nəzarətə götürülüb - YENİLƏNİB 2

Ağdam və Ağdərədə baş verən yanğının söndürülməsi işi davam edir.

Operativ Media xəbər verir ki, Ağdam rayonunun Əliağalı kəndi ərazisində baş verən yanğın zamanı Fövqəladə Hallar Nazirliyinin (FHN) yanğınsöndürən əməkdaşları kənd qəbristanlığına keçməsinin qarşısını alıb.

Həmçinin antiterror əməliyyatlarına qədər Əliağalı və Mollalar kəndində hərbi hissə kimi fəaliyyət göstərən binalar da yanğından mühafizə olunub.

Hazırda yanğınsöndürmə əməliyyatları davam etdirilir.

14:53

Ağdam rayonunun Əliağalı, Yeni Qaralar və Ağdərə rayonunun Sırxavənd kəndləri istiqamətində açıq ərazidə baş vermiş yanğın Fövqəladə Hallar Nazirliyinin qüvvələri tərəfindən görülən zəruri və təxirəsalınmaz tədbirlər sayəsində nəzarətə götürülüb.

Bu barədə Operativ Media-ya FHN-dən məlumat verilib.

Bildirilib ki, hazırda yanğının söndürülməsi istiqamətində əməliyyat davam edir.

Yanğınla mübarizə tədbirlərinə FHN-in Aviasiya dəstəsinin iki ədəd helikopteri və Dövlət Yanğından Mühafizə Xidmətinin qüvvələri cəlb olunub.

***

09:02

Ağdam rayonunun Əliağalı, Yeni Qaralar və Ağdərə rayonunun Sırxavənd kəndləri istiqamətində açıq ərazidə yanğın baş verməsi barədə Fövqəladə Hallar Nazirliyinin “112” qaynar telefon xəttinə məlumat daxil olub və dərhal əraziyə Nazirliyin qüvvələri cəlb olunub.

Operativ Media xəbər verir ki, bu barədə FHN-nin mətbuat xidməti məlumat verib.

Yanğının daha geniş sahəyə yayılmasının qarşısını almaq və söndürülməsi işlərini sürətləndirmək məqsədilə əraziyə FHN-in Aviasiya dəstəsinin iki ədəd helikopteri, Dövlət Yanğından Mühafizə Xidmətinin qüvvələri cəlb olunub.

Hazırda yanğınla mübarizə tədbirləri davam edir.

Əlavə məlumat veriləcək.