Hərbçilərin əmək pensiyasına buraxılması ilə bağlı yenilik nədən ibarətdir?

Hərbi qulluqçulara əmək pensiyası hərbi xidmət dövründə deyil, hərbi xidmətdən buraxıldığı gündən təyin oluna bilər. Bu, "Əmək pensiyaları haqqında" qanuna təklif edilən dəyişiklik layihəsində öz əksini tapıb.

Hərbi ekspert Üzeyir Cəfərov “Operativ Media”ya açıqlamasında təklif edilən dəyişikliklərə münasibət bildirib:

“Hərbçi əgər xidmətdədirsə, o, necə əmək pensiyasına göndərilə bilər? Hər kəsə bəllidir ki, hərbçi gərək xidmətdən tərxis olunsun ki, ona əmək pensiyası təyin olunsun. Bu barədə ümumi qayda var. Hərbçi rütbəsinə, tutduğu vəzifəsinə uyğun olaraq ya hospitala göndərilir, ya da hərbi həkim komissiyasına göndərilir və oradan rəy gələndən sonra yalnız hərbi hissənin və ya xidmət etdiyi qurumun siyahısından silindiyi gündən sonra ona pensiya təyin olunur. Hərbçinin əmək pensiyaçısı olması əcaib səslənir. Əmək pensiyası o deməkdir ki, əmək müqaviləsi bağlanır və əmək müqaviləsinə əsasən insanlar işləyirlər. Hərbçi üçün isə nə bazar, nə bayram günü yoxdur. Ona görə hesab edirəm ki, bu dəyişikliklər uğursuzdur".

Ekspertin sözlərinə görə, hərbçilərin əmək pensiyasına buraxılması ilə bağlı yenilik yoxdur:

"Çünki aydın məsələdir ki, ya yaşa görə, ya xidmət illərinə görə, ya da xəstəlik ilə əlaqədar hərbçi tərxis olunduqdan sonra ona əmək pensiyası təyin olunur. Burada nə yenilik ola bilər? Dünyanın hansı yerində hərbçi xidmətdədirsə, ona əmək pensiyası təyin olunur? Hərbi qulluqçuların əmək pensiyası o vaxt təyin olunur ki, o, tam hərbi ilə üzülüşür. Başqa cür mümkünsüzdür. Yaxşı olardı ki, hərbi qulluqçuların ərzaq əvəzinə pul kompensasiyası, o cümlədən müharibə veteranlarının müavinətlərinin artırılması məsələlərilə məşğul olunsun”.

Sevinc İbrahimzadə