Ekspert: Evlərdə dəm qazı detektorlarının quraşdırılması məcburi olmalıdır
Ayşən Sadıxzadə
Qış fəslində soba, kombi, kamin və digər istilik qurğuları gündəlik həyatın ayrılmaz hissəsinə çevrilir. Lakin bu prosesdə diqqətdən kənarda qalan və birbaşa insan həyatı üçün təhlükə yaradan mühüm məsələ var – tüstü bacalarının vəziyyəti.
Qış mövsümündə tüstü bacalarının təhlükəsi
Qış mövsümündə tüstü bacalarının təhlükəsi
Təhlükəsizlik eksperti Orxan Musayev Operativ Media-ya bildirib ki, tüstü bacası sadəcə tüstünü çölə çıxaran texniki detal kimi görünə bilər, amma düzgün işləmədikdə ciddi fəsadlara yol açır.
Dəm qazı zəhərlənməsi və yanğın riskləri
Onun sözlərinə görə, nasaz və ya tutulmuş tüstü bacaları dəm qazı zəhərlənməsinə, yanğınlara və hətta kütləvi faciələrə səbəb ola bilər. Hər il ölkədə qış mövsümündə bu səbəbdən xeyli insan həyatını itirir.
Tüstü bacalarının əsas problemləri
1. Vaxtında təmizlənməməsi
Çox evlərdə bacalar uzun müddət baxımsız qalır. Fərdi ev sahibləri bacaların vəziyyətinə diqqət etmədiyi halda, çoxmənzilli binalarda isə bacaların və ventilyasiya sistemlərinin təmizlənməsi kommunal xidmətlərin öhdəliyindədir. Lakin əksər hallarda bu işlər lazımi səviyyədə yerinə yetirilmir.
2. Köhnə binalar və texniki nasazlıqlar
Sovet dövründə tikilmiş binalarda və köhnə evlərdə tüstü bacaları artıq istismar müddətini başa vurub. Çatlar, qopmuş kərpiclər və tutulmuş kanallar dəm qazının evə dolmasına səbəb ola bilər.
3. Qeyri-peşəkar müdaxilə
Bəzi ev sahibləri bacaları özləri təmizləməyə çalışır. Lakin düzgün aparılmayan təmizləmə bacaların zədələnməsinə və qaz sızmasına səbəb ola bilər. Bu səbəbdən bacaların təmizlənməsi yalnız ixtisaslaşmış qurumlar tərəfindən həyata keçirilməlidir.
Tüstü bacalarını kim təmizləməlidir?
Qanunvericiliyə görə, fərdi evlərdə bacaların saz vəziyyətdə saxlanması ev sahibinin məsuliyyətidir. Çoxmənzilli binalarda isə bu vəzifə müvafiq kommunal qurumlar və idarəedici təşkilatlara aiddir.
Ekspert bildirir ki, ölkədə vətəndaşlar çox vaxt kimə müraciət edəcəklərini bilmir. Bu səbəbdən vahid və mərkəzləşdirilmiş xidmət sistemi yaradılmasına ehtiyac var.
Dəm qazı detektorlarının önəmi
"Beynəlxalq təcrübə göstərir ki, dəm qazı detektorları faciələrin qarşısını almaqda mühüm rol oynayır. Bu cihazlar qaz sızması zamanı səsli siqnal verərək insanları vaxtında xəbərdar edir.
Avropa ölkələrində – Böyük Britaniya, Almaniya, Skandinaviya – qaz qurğusu quraşdırılan evlərdə detektorların istifadəsi məcburidir. Azərbaycanda isə bu sahədə maarifləndirmə hələ zəifdir. Hər evdə detektor quraşdırılması faciələrin böyük hissəsini önləyə bilər", - ekspert qeyd edib.
