Deputat: Kəlbəcərin yenidən qurulması ölkəmiz üçün prioritetdir

“Azərbaycan xalqı tarix boyu müxtəlif çətinliklər və faciələrlə üz-üzə qalıb. Xüsusilə Qarabağ münaqişəsi dövründə xalqımız həm öz ərazisində, həm də ondan əvvəlki mərhələlərdə ağır sınaqlardan keçib, böyük itkilər verib. Bu dövr təkcə hərbi qarşıdurma deyil, eyni zamanda humanitar faciələrlə yadda qalıb”.

Bu sözləri Operativ Media-ya açıqlamasında deputat Ceyhun Məmmədov deyib. 

O bildirib ki, bu ağrılı hadisələr sırasında Kəlbəcər istiqamətində baş verən faciələr də xüsusi yer tutur:

“Həmin dövrdə bölgədə yaşayan insanların üzləşdiyi çətinliklər, mühasirə şəraiti, zorakılıq və insan itkiləri cəmiyyət üçün dərin travmaya çevrilib. Bu hadisələr uzun illər yaddaşlarda qalacaq acı xatirələrdən biridir.

Bununla yanaşı, Azərbaycanın müasir tarixində mühüm dönüş nöqtəsi də yaşanıb. İkinci Qarabağ müharibəsi nəticəsində Azərbaycan ərazi bütövlüyünün böyük hissəsini bərpa etdi və uzun illər işğal altında qalan torpaqlar azad olundu. Bu, ölkə tarixində yeni bir mərhələnin başlanğıcı oldu.

Bu proses İlham Əliyevin rəhbərliyi ilə həyata keçirildi və post-münaqişə dövründə əsas prioritetlərdən biri azad edilmiş ərazilərin bərpası və yenidən qurulmasıdır. Bu istiqamətdə görülən işlər xüsusilə Kəlbəcər rayonunda da özünü göstərir.

Bu gün Kəlbəcərdə genişmiqyaslı bərpa və quruculuq işləri aparılır, infrastruktur yenidən formalaşdırılır, yaşayış üçün şərait yaradılır. Eyni zamanda bölgənin zəngin təbiəti və turizm potensialı nəzərə alınaraq yeni layihələr həyata keçirilir. Bu isə həm iqtisadi inkişaf, həm də sosial həyatın canlanması baxımından mühüm əhəmiyyət daşıyır”.