İsak Hadjarın Azərbaycan Qran-prisində iştirakı sual altındadır

İsak Hadjarın zədə səbəbindən buraxdığı son üç yarışdan sonra Azərbaycan Qran-prisində “Red Bull”un heyətinə qayıdıb-qayıtmayacağı yaxın günlərdə müəyyənləşəcək.

Operativ Media xəbər verir ki, fransalı pilotun vəziyyəti ilə bağlı yekun qərar son qiymətləndirmələrdən sonra veriləcək. Hadjarın olmadığı müddətdə Maks Verstappenin komanda yoldaşı kimi Liam Lawson çıxış edib.

“Red Bull”un komanda rəhbəri Laurent Mekies bildirib ki, Hadjar yalnız tam sağaldığı təqdirdə əvvəlki mövqeyinə qayıda bilər.

“RacingNews365”in məlumatına görə, Hadjar sentyabrın 21-də, bazar ertəsi günü “Red Bull”un simulyatorunda geniş qiymətləndirmədən keçib. Bildirilib ki, pilotun əlindəki ağrılar azalıb və vəziyyəti yaxşılığa doğru dəyişir.

Simulyator sessiyasından sonra aparılacaq təhlillərin nəticəsinə əsasən yekun qərarın yaxın zamanda açıqlanacağı gözlənilir.

Qeyd edək ki, bu həftəsonu keçiriləcək Azərbaycan Qran-prisi əvvəlki yarışlardan fərqli olaraq bazar günü deyil, şənbə günü baş tutacaq. Qərardan sonra “Red Bull RB22” bolidinin sükanı arxasında Hadjarın, yoxsa Lawsonın çıxış edəcəyi müəyyənləşəcək.

Hadjarın yarışa hazır olduğu təsdiqlənərsə, Lawson “Racing Bulls” komandasına qayıdacaq. Bu halda Yuki Tsunodanın üç yarışlıq müvəqqəti fəaliyyəti də başa çatacaq.

Tsunoda bu müddətdə Lindblad ilə birlikdə yaxşı nəticələr göstərib və Monzadakı İtaliya Qran-prisində xal qazanıb.