Dövlət İmtahan Mərkəzi tərəfindən 2024-cü il 28 aprel tarixində ali təhsil müəssisələrinin magistraturalarına qəbul olmaq istəyənlər üçün imtahanın ikinci cəhdi keçiriləcək.

2024-cü ildən etibarən magistratura səviyyəsinə qəbul imtahanında bakalavrlar yazı bacarıqlarının yoxlanılması üçün onlara təqdim edilən esse yazırlar.

Bəs imtahana girəcək tələbələr esse yazarkən nələrə diqqət yetirməlidirlər? 

Bu barədə Beynəlxalq Maarif Məktəblərinin İngilis dili müəllimi Məhəmməd Qarakişiyev "Operativ Media"ya açıqlamasında bildirib ki, bakalavrlar essedə öz fikirlərini seçdikləri xarici dildə yazı şəklində bildirirlər və bu yazılar qiymətləndirilir:

"Ümumiyyətlə, esseler iki mövzu üzərindən təklif olunacaq. Tələbələr istədikləri mövzunu seçərək öz fikirlərini ifadə edəcəklər. Dövlət İmtahan Mərkəzi tərəfindən qoyulan tələbə görə, esse yazı 150 - 200 söz civarında olmalıdır. Əsasən esselər giriş hissədən başlayır, sonra əsas hissə ilə davam edir. Bu zaman tələbəyə tövsiyə olunur ki, giriş hissəsindən sonra mövzuya uyğun əlaqə yaradacaq cümlələrdən istifadə etsin. Burada mövzu daha dolğun, açıq şəkildə ifadə olunmalıdır, müxtəlif fikirlərdən, sitatlardan, resurslardan istifadə olunaraq fikirlər əsaslandırıla bilər. Eyni zamanda siyasi istiqamətdə olmayaraq müstəqil fikir yürüdülməlidir və oxucuya həqiqətən bu essenin mövzusuya uyğun olduğunu göstərmək lazımdır. Həmçinin akademik səviyyədə olmalıdır. Ən son olaraq nəticə hissəsində fikirlər yekunlaşdırılmalıdır".

Qeyd edək ki, magistratura imtahanında esse yazısında iştirak edib-etməmək bakalavrın öz seçimindən asılıdır. İştirak edən tələbələrə isə imtahan üçün ayrılmış 3 saatdan əlavə, 30 dəqiqə də verilir. Esse yazısının qiymətləndirilmə meyarları 5 bal üzərindən dəyərləndirilir.

Sevinc İbrahimzadə