Sosial şəbəkələrdə Xəqani küçəsində 3 geniş avtomobil zolağının üzərində salınan velokeçidin təhlükəli olduğu, düzgün yerdə salınmadığı barədə müzakirələr var.
Nəqliyyat məsələləri üzrə ekspert Rauf Ağamirzəyev "Operativ Media"ya açıqlamasında mövzuya münasibət bildirib:
"Bu, Fikrət Əmirov küçəsi boyu çəkilmiş velozolaqdır və qeyd olunan sahə Xəqani küçəsi ilə kəsişən hissədir. Bu hissədə düşünürəm ki, gələcəkdə piyada keçidinin də əlavə olunmasına ehtiyac var. Bu velozolaq hələ şəbəkələşir, yəni işlər tam bitməyib. Həmin velokeçid Fikrət Əmirov küçəsi ilə üzü Muğam bağı istiqamətində davam edir, sonra "28 May", Dəmiryol vağzalı meydanına əlaqələnəcək. Bu da yaxın zamanların işidir. Yeri gəlmişkən, orada da bir az təkmilləşməyə ehtiyac var. Çünki Fikrət Əmirov küçəsi ilə "28 May" küçəsində velosiped keçidi bir neçə metrdən sonra piyada zolağıdır və bu da haqlı narazılığa səbəb olur. Çünki sürücülər əvvəlcə velozolaqda saxlayır, bir neçə metrdən sonra piyada zolağında saxlayır. Buna görə də keçidlərin paralel olaraq bir-birinə yaxın yerdə təşkilinə ehtiyac var ki, həm sürücülərə rahat olsun, həm velosipedçilərə, həm də piyadalara".
Ekspertin sözlərinə görə, bu məqamların aradan qaldırılmasına ehtiyac var və işlər görüldükcə belə səhvlər olmayacaq:
"Çünki zolaq şəbəkəsi bu ilin əvvəlindən daha aktiv olaraq çəkilməyə başlayıb və bu da insanlarımızın qısa məsafədə mikromobillik vasitələri üçün yaradılmış şəraitdir. Təxminən gələn ay veloşerinq xidməti, yəni paylaşılan velosiped xidməti aktivləşəcək. Bunun vasitəsilə də şəxsi velosipediniz olmasa, bir yerdən icarəyə götürüb, müəyyən məsafəni qət edəndən sonra park edib və səfərinizə davam edə bilərsiniz. Eyni zamanda bu günlərdə artıq mövcud işıqforlarda velosiped keçidi əlavə olunacaq. Bu da daha nizamlı hərəkətin təşkili yönündə doğru qərardır".
Sevinc İbrahimzadə