“Son günlərdə Gürcüstanda ikinci əl avtomobil bazarında durğunluq yaşanır. Bu da qiymətlərə kəskin təsir edib. Gürcüstan bazarında ikinci əl avtomobillərdə təxminən 500-1000 dollar civarında ucuzlaşma müşahidə edilir”.

Bunu “Operativ Media”ya açıqlamasında avtomobil satışı üzrə ekspert Sərxan Qədirov deyib.
 
Ekspertin sözlərinə görə, ötən il Gürcüstana nəqliyyat vasitəsi hər zamankından daha çox idxal olunub. İdxal çox olsa da, başqa dövlətlərdən Gürcüstana avtomobil almağa gedənlər elə də maraq göstərməyiblər:

“Bu, alıcıların internet üzərindən daha rahat formada başqa dövlətlərdən maşın almaları ilə əlaqəlidir. Gürcüstana gedən müştərilər, artıq Dubaya axın edirlər. Dubayda keçirilən auksionlara axın edirlər. Çünki Gürcüstanda alıb satan şəxslərdir. Amerikada auksionda oturub udduqları avtomobilləri Gürcüstana gətirirlər, müəyyən təmir işlərini görüb biraz baha qiymətə satırdılar. Alıcılar isə artıq daha sərfəli, daha əlçatan üsulu seçiblər. Gürcüstan bazarı əvvəl daha aktual idi”.
 
Ekspert qeyd edib ki, hər il Azərbaycana qonşu ölkədən minlərlə avtomobil gətirilir. Yaranmış böhran ölkəmizə gətirilən nəqliyyat vasitələrinin qiymətinə təsir göstərə bilər:

"Qiymətlər nə qədər aşağı düşsə də, Dubaya gedib almaq daha sərfəlidir. Oradan alınan avtomobilin qiyməti daha münasibdir. Amma ola bilsin qiymət daha da aşağı düşsün. Bizdəki alıcılar qeyd etdiyim ölkədən alıb satanlardır. Onlara hansı sərf edirsə, o yol ilə avtomobil əldə edirlər. Ötən il Gürcüstandan Azərbaycana avtomobil ixracında rekord qeydə alınıb. 2023-cü ildə bu ölkədən Azərbaycana 22 min 393 ədəd avtomobil gətirilib”.