Gələn ilin dövlət büdcəsinin proqnozlarında vergilərlə bağlı müəyyən dəyişikliklər gözlənilir.
Həmçinin 2024-cü ildə sosial xarakterli güzəştlər vasitəsilə əhalinin vergi yükünün azaldılması nəzərdə tutulur.
Bəs bu dəyişikliklər hansı sahələri əhatə edəcək?
Bununla bağlı iqtisadçı ekspert Eldəniz Əmirov “Operativ Media”ya bildirib ki, vergi güzəştləri ölkə iqtisadiyyatının inkişafı üçün vacibdir və vaxtaşırı Vergi Məcəlləsinə dəyişikliklərin olunması həm diferensiallıq, həm də dayanıqlıq baxımından bir zərurətdir.
O, qeyd edib ki, hər il hansısa əlavələr olunur və bu, 2024-2037-ciillər üzrə vergi siyasətində bir sıra istiqamətlərdə dəyişikliklərin olması gözlənilir:
"Elm və təhsil, səhiyyə, idman, mədəniyyət sahələrində fəaliyyət göstərən subyektlərin ictimai və sosial məqsədlər üçün yaradılmış fondlara köçürülməsi zamanı mənfəətlərinin vergidən azad olunan 10 faizlik hissəsinin 15 faizə qaldırılması nəzərdə tutulur.
Eyni zamanda hədiyyələrin, təhsil haqlarını ödəmək üçün olan maddi yardımın və birdəfəlik müavinətin dəyərinin gəlir vergisindən azad olunan hissəsinin 1000 manatdan 2500 manatadək qaldırılması və fiziki şəxs olan istehlakçılar tərəfindən ödənilmiş ƏDV-nin qaytarılması zamanı əldə olunan gəlirin vergidən azad olunması gözlənilir.
2023-cü ildə olan dəyişiklərdə işğaldan azad olunmuş ərazilərdə fəaliyyətə görə olan güzəştlər yenə də qüvvədə qalacaq”.
Ekspert həmçinin ölkədə inflyasiyanın qarşısının alınması üçün müxtəlif tədbirlər görüldüyünü də vurğulayıb:
"Belə ki, idxalı əvəz edən yerli məhsulların istehsalını dəstəkləmək məqsədilə 2023-cü ildə də tətbiq edilən vergi gömrük güzəştləri var ki, onlar da 2024-cü ildə davam edəcək. Bununla yanaşı daxili istehsalda istifadə edilən bir sıra xammal və aralıq mallara tətbiq olunan idxal gömrük rüsumlarının dərəcəsi 2024-cü ildən yeddi il müddətinə, yəni 2031-ci ilədək sıfır dərəcəyə endiriləcəkdir”.
E.Əmirov vergidəki dəyişikliklərin təsirindən də bəhs edib:
"Vergi dəyişikliyi qiymətlərə də təsir edir. Təbii ki, bütün subyektlər az məbləğdə vergi vermək istəyir. Vergilərin həm mənfi, həm də müsbət cəhətləri var. Burada bir qızıl orta var ki, onu tutuzdurmaq lazımdır”.
