Əhmədlidəki binaların bir hissəsini istiliklə təmin edən xətlərdə temperatur normadan aşağı düşüb

“Azərenerji" ASC-nin Bakı İstilik Elektrik Mərkəzində yaranmış qısa müddətli nasazlıq səbəbindən, “Azəristiliktəchizat” ASC tərəfindən Əhmədli qəsəbəsində yerləşən yaşayış binalarının bir hissəsini istiliklə təmin edən xətlərdə istiliyin temperaturu normadan aşağı düşüb.

Bu barədə Operativ Media “Azəristiliktəchizat”a istinadən xəbər verir.

Məlumata görə, "Azərenerji"nin mütəxəssisləri tərəfindən görülən təxirəsalınmaz tədbirlər nəticəsində yaranmış nasazlıq aradan qaldırılıb, hazırda temperaturun tələb olunan səviyyəyə çatdırılması üçün tənzimləmə işləri görülməkdədir.

Qurum yaranmış narahatçılığa görə istehlakçılardan üzr istəyir.