Talassemiyalı uşaqlar üçün toplanmış vəsaiti dələduzluq yolu ilə ələ keçirməkdə təqsirləndirilənlərin məhkəməsi keçirilib

Talassemiyalı uşaqlar üçün toplanmış bir milyon manata yaxın vəsaiti dələduzluq yolu ilə ələ keçirməkdə təqsirləndirilən şirkət sahibi Nuridə Seyidova və digər iki nəfər – Aynur Bayramova və Aysel Məmmədovanın cinayət işi üzrə məhkəmə prosesi keçirilib.

Operativ Media  xəbər verir ki, Bakı Ağır Cinayətlər Məhkəməsinin hakimi Azad Məcidovun sədrliyi ilə keçirilən prosesdə zərərçəkmiş şəxs qismində Aynur Orucova ifadə verib.

Qadın bildirib ki, oğlu talasemiyya xəstəsi olub:

"MC hospitala gedirdim. Orada Günel xanım vardı. Onun vasitəsilə Nuridə Seyidova və Aynur Bayramovanı tanıdım. Günel xanımın özü də xəstələri aparırdı. Sadəcə o məndən 20 min dollar pul istəmişdi. Sadəcə bizim o boyda pulumuz yox idi. Günel xanım dedi ki, sponsorlar vasitəsilə Nuridə aparır. Biz də gedib Nuridə və Aynurla görüşdük. Bizim də 25 min manat pul vardı. Həmin vaxt yataqxanadakı evimi satmışdım. Dedilər 25 min manatı dollar edin. Bizdə 15 min dollar elədik. Sonra Aynur mənə zəng elədi ki, pulu tez gətirin. Qaynatamla "Çinar Palace" getdik, pulu Aynurla Nuridəyə verdik. Pulu Toğrul sayıb götürdü".

Təqsirləndirilən Aynur Bayramova zərərçəkənin ifadəsinə etiraz edib və bildirib ki, zərərçəkən pulu verəndə otaqda olmayıb.
Hakim Aynur Bayramovaya xəbərdarlıq edib və yerindən danışmamağını tapşırıb. 

Təqsirləndirilən Nuridə Seyidova isə bildirib k, 15 min dollardan 7 min dollar Acıbədəm xəstəxanasına ödənilib, 2-3 min dollar da ailənin otel və yemək xərclərinə ödənilib.