Xocalı şəhəri 1 nömrəli tam orta məktəbin müəllimi : "Dərs dediyim sinfin pəncərəsi ata-baba yurduma baxır"

"2024-cü ilin sentyabrının 15-dən Xocalı məktəbində dərs deyirəm. Hər gün burada təhsil alan şagirdlərə Xocalı soyqırımı haqqında məlumat veririk. Bu gün isə tamamilə fərqli idi. Dərs zamanı Xocalı soyqırımı ilə bağlı geniş şəkildə danışdıq. Bu gün biz Xocalı soyqırımı günündə azad Xocalıdayıq. Nə qədər ağır və acı olsa da biz həm də qürur hissi keçiririk".

Bu sözləri Operativ Media-ya Xocalı şəhəri 1 nömrəli tam orta məktəbin ibtidai sinif müəllimi Ruhiyyə İmani deyib.

 "33 ildən sonra Xocalıda dərs demək çox qürurvericidir. Mənim dərs dediyim sinif pəncərəsi ata-baba yurduma baxır. Bu sinifdə dərs keçərkən çox qarışıq hisslər keçirirəm. Sinifdə dərs keçdiyim bir çox şagird hərbiçi övladıdır. Mən özüm Xocalı sakiniyəm. Mənim atam da Xocalıda şəhid olub. Bir şəhid qızı kimi, Xocalıya ilk gələn müəllimlərdən biriyəm".

Qeyd edək ki, Xocalı şəhərində fəaliyyət göstərən 2 məktəbdə 154 şagird təhsil alır. Şagirdlərin təlim-tərbiyəsi ilə 30 nəfər pedaqoji heyət məşğul olur.

Gülcahan Məmmədova