Üzərində reklam olan avtomobillərin sayı arta bilər - AÇIQLAMA

Son zamanlarda paytaxt Bakımızda bəzəkli və işıqlı maşınlar yəqin ki, qarşınıza çıxıb. Maraqlı və yenilikçi reklam növü kimi dəyərləndirilən bu strategiya şirkətlərin, mağazaların, məhsulların tanınmasında, fəaliyyətində böyük rol oynayır.

Mövzu ilə bağlı "Operativ Media"ya açıqlama verən reklam mütəxəssisi Elçin Rüstəmli bildirib ki, bu metod daha çox dinamik reklam növü sayılır:

“Günün istənilən saatlarında, insanların sıx olduğu ərazilərdə reklam maşınları daha effektiv nəticələr verir. Bu xidmətin digərlərindən əsas fərqi maksimum görüntünün əldə edilməsi, diqqətin anlaşılan şəkildə təmin olunması, insanlarda pozitiv maraq oyatmasıdır. Parlaq rənglər, geniş ərazi və qeyri-adi formalar yoldan keçənlərin diqqətini üzərinə çəkir. Bununla da qısa müddət ərzində minlərlə insanın yeni və yaxud az tanınmış markaya tələbatı artır. Bu reklam növü daha çox Bakıda istifadə olunsa da, Azərbaycanın bütün bölgələrində reallaşdırmaq olar".

Onun sözlərinə görə, bu maşınlardan istifadə etmək üçün əsas şərtlərdən biri adiyyatı üzrə icazələrin alınmasıdır.

Bu məsələ həll olduqdan sonra istənilən markanı, brendi mükəmməl şəkildə təqdim etmək mümkündür.

"Avtomobillərin üzərində reklam yerləşdirilməsi üçün ilk növbədə müvafiq icazələr alınmalıdır. Həmin icazə sənədləri də sürücüdə olmalıdır ki, onu yol polisi saxladıqda icazəsini təqdim edə bilsin. Bütün bunlar əslində o qədər də çətin proseslər deyil".

E.Rüstəmli onu da bildirib ki, yaxın gələcəkdə ölkəmizdə reklam avtomobillərinin sayında artım da görə bilərik: 

"Banklar, beynəlxalq brendlər, dövlət qurumları tez-tez fərqli reklam və ya maarifləndirmə üsullarını sınayırlar. Yuxarıda da qeyd etdiyimiz kimi, bunlardan biri də reklam avtomobilləridir. Son zamanlar ölkəmizdəki banklar da bu cür reklamlara üz tutublar. Bu o deməkdir ki, biz yaxın gələcəkdə başqa brendlərin də avtomobil üzərində reklamlardan istifadə etməsinin şahidi olacağıq".