Milli Qəhrəman Mübariz İbrahimov adına Biləsuvar Bağça-Məktəb-Lisey Kompleksinin 2023/2024-cü tədris ili üzrə 34 şagirdi məzunu olub.
"Operativ Media" xəbər verir ki, məzunlar ali məktəblərə 100% qəbul nəticəsini əldə edərək böyük uğura imza ataraq Milli Qəhrəmanın adını daşıyan Təhsil Kompleksinin 13 illik ənənəsini davam etdiriblər.
Məzunlardan ən yüksək balı İsayeva Nuray Siyasət qızı toplayıb. O, 663 balla Bakı Dövlət Universitetinə qəbul olub. Digər məzunlardan 9 nəfəri Azərbaycan Dövlət Neft və Sənaye Universitetinə, 8 nəfəri Bakı Dövlət Universitetinə, 4 nəfəri Azərbaycan Dövlət İqtisad Universitetinə, 3 nəfəri Azərbaycan Dillər Universitetinə, 2 nəfəri Azərbaycan Dövlət Pedaqoji Universitetinə, 1 nəfəri Qarabağ Universitetinə, 1 nəfəri Xəzər Universitetinə, 1 nəfəri Azərbaycan Universitetinə, 1 nəfəri Dövlət Gömrük Akademiyasına, 1 nəfəri Bakı Ali Neft Məktəbinə, 1 nəfəri Bakı Mühəndislik Universitetinə və 1 nəfəri isə Naxçıvan Tibb Universitetinə qəbul olub.
Qeyd edək ki, Kompleks yarandığı gündən bu günə kimi 319 məzunu olub və onların hər biri ali məktəblərə qəbul olmaqla ənənəyə sadiq qalıb.
Məzunları ürəkdən təbrik edir, gələcək həyatlarında onlara uğurlar arzulayırıq!
