Son zamanlar göz rənginin dəyişdirilməsi əməliyyatına maraq xeyli artıb.

“Operativ Media” xəbər verir ki, göz rənginin dəyişdirilməsi prosesi keyitmə altında 40-60 dəqiqə vaxt aparır. Əməliyyatdan əvvəl həmin şəxsin bu prosedura uyğun olub-olmaması yoxlanılır. Daha sonra əməliyyat olunacaq şəxs göz rəngini seçir. Əməliyyatın qiyməti isə ölkəmizdə 9000 AZN-dən başlayır.

Bəs bu əməliyyatın gözə ziyanı var?

Məsələ ilə bağlı oftalmoloq Aynurə Əliyeva bildirib ki, bu əməliyyat korluqla nəticələnə bilər:

"Bu əməliyyatının iki metodu var. Azərbaycanda daha çox buynuz qişaya boya yeritməklə göz rəngi dəyişilir. Bu əməliyyatda boya maddəsi buynuz qişaya yeridilir, buynuz qişa gözün qarasının, bəbəyinin üzərini örtən şəffaf hissəsinin rəngini dəyişir. Bu boya gözə xüsusi texnologiya ilə yeridilir. Bu zaman buynuz qişaya müdaxilə olunduğuna görə, onun qatlarında deformasiya yarana bilər. Bundan əlavə gözdə quruluq və həmin şəxsdə işığa qarşı həssaslıq yarana bilər. Bunlar yüngül ağırlaşmalardır. Bu əməliyyat ən pis halda göz altı təzyiqi qaldıra bilər. Bu təzyiq yüksəldikcə görmə sinirinə basqı yaradır. Bu zaman isə sinir yavaş-yavaş sıradan çıxa bilər. Nəticədə görmə qabiliyyətini zəiflədə, hətta korluğa gətirib çıxara bilər".